ساكن الضريح بقلم ميادة مأمون ج٦
-طب انا اسفة حقك عليا انا عارفة، اني تعبتك و كمان طولت لساني عليك كتير بس انت عودتني انك ديماً بتسامح.
-و هاتفضلي كده لحد امتى.
بدئت تزيد من دلالها عليه اكثر.
-طول عمري هافضل أدلع عليك، وانت هاتفضل طول عمرك تسامح و تحبني.
-واثقة من نفسك انتي اوي.
-طبعاً دا انا مرات الدكتور مالك الرفاعي و أم ابنه الجاي كمان.
-ههههههههه اه ابني اهو دا بقى احلى مكافأة بعد كل التعب اللي تعبناه ده.
-فرحان يا مالك.
-فرحان و بس، انتي مش ملاحظة انا بحب عيال حسام صاحبي اد ايه.
-ملاحظة طبعاً و عارفة انك حنين اوي عشان كده ربنا رزقك بيا و بالبيبي كمان ههههههههه.
-هههههههه و ده احلى رزق يا قلبي.
❈-❈-❈
اليوم هو يوم العرس المعهود.
سيتم عقد قران والدتها على الطبيب عبدالرحمن في بيت الرفاعي و ستذهب بعده معه إلى بيت الزوجية.
تجمعت نساء البيت مع العروس في غرفتها، و قررت شذى ان تشاكسها.
-يلا يا عروسة عشان أزوقك بأديا.
-بس يا بنت بطلي هزار.
ضحكت الحاجة مجيدة، و تدخلت في الحديث هي الاخري.
-هزار ليه بقى، انتي مش عروسة ولازم تتزوقي لعريسك.
-لاء طبعاً زواق ايه يا مجيدة، هو انا لسه عيلة صغيرة.
-هههههه لاء يا مامتي انتي احلى عروسه يلا بقي عشان تجهزي خلينا نفرح و النبي لانا مزغرطه لولولولي.
دق مالك على باب الغرفة و فتحه بعد أن سمحو له بالدخول، و عند ولوجه لهم تفاجئ بصراخ ماجدة.
-مالك خد مراتك من هنا لو سمحت.
-الله زعلانة ليه بس دانا سامع زغاريط و حاجات حلوة كده بقالنا كتير مسمعناهش.
-يا سيدي افرحو براحتكم، بعيد عني، خد البت دي من هنااااا.
-ههههههه اهدي بس يا ماجدة مش كده، خليكي ريلاكس شوية عشان المأذون جيه تحت ولو انتي جاهزة يا ريت تتفضلي بقى معايا.
اعترضت شذى طريقها قبل أن تقف معه، متصدرة لها ببطنها الذي بدء يرتفع قليلاً.
-و الله ابداً، لازم ازوقك الاول مش هاتخرجي من هنا غير و انا حاطه ليك روج على الاقل.
زمجرت ماجدة بغلاظة وقد نفذ صبرها.
-ابعدي عني يا شذى، احسن و الله اضربك في كرشك ده.
ليتدخل مالك سريعاً ساحب تلك الفظه خلف ظهره، ليبعدها عن بطش والدتها.
-لاء بالله عليكي مالكيش دعوة بكرشها، و انتي يا ستي بطلي تهور و ابعدي عنها بقى الله يهديكي.
وضعت الحاجة مجيدة ذراعها على كتف شذى لتتكئ عليها متبعينهم للخارج.
