جوزي كل ليلة أول ما الساعة تدق 3 الفجر بقلم صابرين محمد

جوزي كل ليلة أول ما الساعة تدق 3 الفجر ينزل البدروم ويرجع بعد نص ساعة وهدومه كلها تراب. كل ما أسأله كان بيقول هقولك بعدين لكن كل ليلة كان يكرر نفس الجملة ومن غير ما يقول أي حاجة … عرفت إن اللي تحت التراب ماكانش كنز ولا صندوق آثار. فضلت واقفة مكاني، رجلي كأنها اتسمّرت في الأرض وأنا شايفة جوزي واقف قدام المكان، أنفاسه طالعة متقطعة وإيده بترتعش وهو ماسك الكشاف وعينه معلقة بالجزء الصغير اللي ظهر من تحت التراب، كأنه خايف يصدق اللي شايفه، أو يمكن خايف يكون فهمه صح. لأول مرة أشوفه بالشكل ده؛ راجل طول عمره هادي، بيتعامل مع أصعب المواقف بعقل بارد واقف دلوقتي كأن كل خبرته اختفت في لحظة واحدة. ماعدتش دقيقتين، إلا وسمعنا صوت خطوات سريعة جاية من آخر الممر، صوتها كان بيتردد بين الحجارة القديمة ويكبر مع كل خطوة، لحد ما ظهر نور كشاف تاني بيشق الضلمة وكل ما صاحبه يقرب كانت ملامحه تبان أكتر. كان راجل في سن جوزي تقريبًا. أول ما وصل وقف ياخد نفسه وبص له بقلق واضح وقال فين؟ جوزي ما ردش واكتفى إنه أشار بإيده ناحية المكان من غير ما ينطق ولا كلمة. الراجل قرب بحذر شديد وركع على ركبته وفضل يبص حوالي دقيقة كاملة، من غير ما يمد إيده أو يحاول يلمس أي حاجة وبعدها رفع عينه وقال بصوت منخفض إحنا منلمسش أي حاجة لو ده اللي أنا فاكره، يبقى لازم يفضل زي ما هو. رد جوزي بسرعة وكأنه مستني السؤال والله ما لمست غير التراب كنت بشيله سنة سنة عشان أشوف اللي تحته وأول ما ظهر الجزء ده وقفت. رجع السكون يسيطر على المكان. ماكانش سكون عادي كان سكون يخلي الواحد يسمع صوت نفسه وهو بيتنفس وصوت قطرات الميه وهي بتنزل من سقف النفق الحجري وريحت التراب القديم والرطوبة مالية المكان لدرجة إن النفس نفسه بقى تقيل. وفجأة رجلي خبطت في حجر صغير. الصوت كان بسيط جدًا لكن وسط الهدوء ده كان كأنه انفجار. الاتنين لفوا ناحيتي في نفس اللحظة والكشافين اترفعوا على وشي ولحظتها شفت الصدمة مرسومة في وش جوزي. إنتي؟! خرجت من مكاني ببطء وأنا حاسة إن لساني اتربط. قال بعصبية ممزوجة بخوف واضح إنتي نزلتي ورايا؟! إنتي مجنونة؟ لو كان السقف اتحرك أو الممر انهار؟ هزيت راسي وأنا بالكاد عارفة أتكلم.أنا ماقدرتش أستحمل كل ليلة كنت بتنزل وكل يوم كنت بتتغير قدام عيني وكان لازم أعرف الحقيقة. فضل يبصلي ثواني طويلة وبعدها ساب الكشاف من إيده وقعد على أقرب حجر وكأن الحمل اللي كان شايله فوق كتفه بقى أكبر من إنه يقدر يكمله لوحده. الراجل التاني بصلي بهدوء وقال أنا زميله في الشغل متخصص في ترميم المباني التاريخية. من أول ما كلمني على الشرخ اللي ظهر في البدروم وأنا بقوله يتحرك بحذر ولما بدأ يشك إن تحت البيت فيه فراغات قديمة، اتفقنا إنه ما يبلغش أي جهة قبل ما نتأكد إن المكان آمن، لأن أي دخول عشوائي كان ممكن يضيع الأدلة أو يسبب انهيار. بصيت حواليّا. الممر كان طويل بشكل يخوف والحجارة ضخمة ومتآكلة والسقف فيه شروخ قديمة، لكن واضح إنها مستقرة من سنين طويلة. قلت بصوت واطي إحنا فين؟ رد جوزي وهو لسه باصص قدامه إحنا تحت جزء من الإسكندرية القديمة. فضلت ساكتة، مستوعبتش قصده. فكمل وهو بيشير للممر لما الأرض شرخت في البدروم، افتكرت الموضوع مجرد هبوط بسيط، لكن وأنا بفحص الشرخ اكتشفت تجويف تحت الأرض. في الأول نزلت أتأكد إنه آمن وبعدها بدأت أراجع خرايط قديمة للمنطقة مع زميلي وعرفنا إن فيه احتمال تكون هنا ممرات تاريخية مطمورة. من يومها بقيت أنزل كل ليلة والساعة تلاتة تحديدًا، لأن البيت والمنطقة كلها بيبقوا هاديين ومفيش اهتزاز عربيات ولا حركة فوق الأرض وده كان بيساعدني أسمع أي فراغ أو تغير في التربة وكل ليلة كنت أزيل طبقة صغيرة جدًا من التراب، لأن أي استعجال كان ممكن يوقع السقف فوق دماغي. سألته وأنا لسه مش مصدقة وكنت بتدور على إيه؟ ابتسم ابتسامة متعبة وقال في الأول افتكرت آثار ويمكن سرداب قديم. لكن لما بدأت العلامات تزيد، رجعت خرائط أكتر واتأكدت إن المكان مختلف وساعتها كلمت زميلي واتفقنا إننا نكمل بحذر لحد ما نفهم إحنا واقفين قدام إيه. سكت لحظة، ثم أضاف الليلة دي كانت أول مرة نوصل للنقطة دي. قربنا كلنا من المكان. الراجل نزل على ركبته ولبس قفازات كانت معاه في الشنطة وبعدها بدأ يزيح التراب حوالين الجزء الظاهر بمنتهى الحرص، من غير ما يلمس أي شيء بشكل مباشر. كل شوية كان بيظهر جزء جديد من تحت التراب وكأن المكان بيكشف سره ببطء بعد ما فضّل مخبيه عشرات السنين. في الأول ظهر طرف قماش متآكل، لونه اختفى تقريبًا من كتر الزمن وبعده ظهرت قطعة معدن باهتة غطاها الصدأ بالكامل، ثم بدأت ملامح عظام بشرية تتكشف واحدة وراء التانية وكل حفنة تراب كانت بتزيحها إيد زميل جوزي كانت بتأكد إن اللي قدامنا مش مجرد اكتشاف أثري ولا صندوق كنوز ولا بقايا مبنى قديم، لكن رفات إنسان ظل مدفونًا في قلب النفق سنين طويلة من غير ما حد يعرف إنه موجود. في اللحظة دي حسيت إن الدنيا كلها بتميل بيا. سندت ضهري على الحيطة الحجرية وأنا بحاول أستوعب اللي شايفاه، لكن دماغي كانت مليانة أسئلة بتتزاحم من غير ما ألاقي لها إجابة. مين الإنسان ده؟ إزاي وصل للمكان البعيد ده؟ وليه انتهت حياته في آخر ممر محدش كان يعرف أصلًا إنه موجود؟ جوزي فضل واقف ثواني وهو باصص للرفات وبعدها أخد نفسًا طويلًا وقال بحسم وكأنه حسم صراع كان شغال جواه من أول يوم نزل فيه المكان إحنا هنطلع ومحدش هيلمس أي حاجة. هز زميله رأسه موافقًا وقال ده الصح أول ما الجهات المختصة تبدأ شغلها الصبح هنبلغ فورًا. أي تصرف دلوقتي ممكن يضيع دليل مهم أو يعرض المكان للانهيار. بصيت لجوزي باستغراب وسألته يعني كنت عارف إن ممكن يكون فيه حاجة بالشكل ده؟ رد وهو بيطفي الكشاف لا كنت شاكك إن فيه ممرات تاريخية أو آثار قديمة، لكن أول ما ظهرت العظام عرفت إن الموضوع خرج من إيدينا خلاص. طلعنا من النفق في هدوء وكل واحد فينا كان غارق في أفكاره. وقبل ما نقفل الفتحة، رجع جوزي بص عليها للمرة الأخيرة واتأكد إن كل حاجة رجعت زي ما كانت، لأنه كان خايف حد ينزل قبل وصول المختصين، أو يحاول يسرق أي حاجة من المكان. رجعنا البيت. لكن الليلة دي ماعرفناش يعني إيه نوم. كنت كل شوية أبص في الساعة وأفتكر المنظر اللي شوفته تحت الأرض وأسمع في ودني صوت احتكاك التراب بالعظام وأحاول أقنع نفسي إن كل ده حصل فعلًا، مش مجرد كابوس. أول ما النهار طلع، خرج جوزي ومعاه زميله وبعد ساعات قليلة بدأت عربيات الجهات المختصة توصل واحدة ورا التانية. في وقت قصير، بقى البيت كله مليان حركة. مهندسون وأثريون وفنيون وأفراد من جهات التحقيق. وكل واحد داخل ومعاه أجهزة مختلفة، منهم اللي بيقيس استقرار التربة ومنهم اللي بيفحص الممرات ومنهم اللي بيصور كل تفصيلة قبل ما حد يقرب منها. عرفت وقتها ليه جوزي رفض يلمس أي حاجة. لأن أي خطوة غلط كانت ممكن تضيع دليل فضل محفوظ تحت الأرض أكتر من خمسين سنة. قعدوا ساعات طويلة جوه النفق. ولما بدأوا يطلعوا، كانت معاهم صناديق حفظ خاصة وأكياس مخصصة لنقل الرفات والأدلة وكل واحد خارج من تحت الأرض كان وشه عليه نفس التعب ونفس الدهشة. بعد يوم واحد، الخبر بقى حديث المنطقة كلها. الناس اتجمعت قدام البيت. كل واحد بيحكي رواية مختلفة. فيه اللي قال إنهم لقوا كنز. وفيه اللي قال مدينة كاملة. وفيه اللي حلف إنه شاف تماثيل. لكن الحقيقة كانت مختلفة تمامًا. اللي لقيناه ماكانش كنز .. كان حكاية إنسانة انتهت قبل ما حد يعرف نهايتها. بدأت التحقيقات واستمرت أيام. وكان جوزي بيتستدعى كل يوم عشان يحكي بالتفصيل إزاي اكتشف الشرخ وإمتى نزل أول مرة وليه استمر ينزل كل ليلة وإزاي وصل للمكان. ولما كنت أسأله كل مسا عرفوا مين؟ كان يهز رأسه ويقول لسه التحاليل لسه شغالة. مر أسبوع كامل وأنا شايفة الإرهاق بيزيد على وشه، لكن في صباح هادئ، دخل البيت لأول مرة وهو بيبتسم. ابتسامته ماكانتش ابتسامة فرح. كانت ابتسامة إنسان أخيرًا ارتاح ضميره. جريت عليه وقلت بسرعة عرفوا؟ قعد على الكرسي وسكت لحظة، ثم قال بهدوء أيوه عرفوا. حبست نفسي وأنا مستنية يكمل. قال عرفوا صاحبة الرفات. سألته بسرعة إزاي؟ رد في إيدها كان فيه خاتم زواج منقوش عليه أول حرفين من اسمها واسم جوزها ومعاه سلسلة فضة قديمة وده خلاهم يرجعوا لمحاضر الاختفاء القديمة. وبعد مراجعة السجلات وتحليل الحمض النووي مع أحد أحفاد إخواتها، اتأكدوا إن الرفات فعلًا لعروسة اختفت من أكتر من خمسين سنة. اتسعت عيني وأنا بحاول أستوعب كلامه. سألته طب وصلت هناك إزاي؟ تنهد وقال المهندسبن اكتشفوا إن ليلة اختفائها حصل هبوط أرضي مفاجئ، فسقطت داخل تجويف كان متصل بشبكة الأنفاق القديمة وبعدها حصل انهيار تاني قفل الممر بالكامل، فاختفت من غير ما يسيب الحادث أي أثر فوق سطح الأرض وعشان كده فضلت مفقودة كل السنين دي. سكت وأنا كمان سكت. خمسين سنة كاملة أسرة عاشت عمرها كله وهي مستنية بنتها ترجع، أو حتى تعرف هي راحت فين. وخمسين سنة كان فيها السر كله مدفون تحت بيتنا. بعد أيام قليلة اتسلمت الرفات إلى أهلها واتدفنت في جنازة هادية حضرها أحفاد وأقارب ماكانوش يتخيلوا إنهم هيعرفوا الحقيقة بعد كل العمر ده. أما البيت فما بقاش بالنسبة لي مجرد بيت قديم بقى شاهد على سر عاش نص قرن تحت الأرض. وبعد أسابيع أعلنت الجهات المختصة إن أعمال المسح كشفت عن ممرات وأنفاق تانية لسه مقفولة بالكامل وإن عمليات الدراسة هتستمر لفترة طويلة. ومن يومها كل ما الساعة تقرب من تلاتة الفجر وأعدي جنب باب البدروم أبص له من غير ما أحس وأفتكر إن تحت رجلي لسه فيه طرق محدش مشي فيها من عشرات السنين وأسرار يمكن لسه مستنية اللحظة اللي تقرر فيها تخرج للنور ويمكن اللي اكتشفناه ماكانش إلا أول سر من أسرار كتير ما زالت مستخبية تحت الإسكندرية. تمت بقلم صابرين محمد